Egrisi TV
5 days 16 hours ago
დღეს, ჯვართამაღლების საუფლო დღესასწაული და საქართველოს უახლესი ისტორიის ერთ-ერთი ყველაზე ტრაგიკული დღეა, ხსოვნისა და იმედის დღე საქართველოში...
სოხუმის დაცემის 29-ე წლისთავთან დაკავშირებით და აფხაზეთის ომში დაღუპულთა ხსოვნის პატივის მისაგებად, სახელმწიფო რწმუნებულმა სამეგრელო-ზემო სვანეთის მხარეში, გიორგი გუგუჩიამ, სახელმწიფო რწმუნებულის პირველმა მოადგილემ, ნინო ვიბლიანმა, სახელმწიფო რწმუნებულის მოადგილემ, დავით კუხალეიშვილმა, სენაკის მუნიციპალიტეტის მერმა, ვახტანგ გადელიამ, მერის მოადგილემ, ლევან ელიავამ, სენაკის მუნიციპალიტეტის საკრებულოს, ადგილობრივი თვითმმართველობის წარმომადგენლებმა, ომისა და სამხედრო ძალების ვეტერანებმა და რიგითმა სენაკელებმა, გვირგვინებით შეამკეს საქართველოს ეროვნული გმირების: ჟიული შარტავას, გენო ადამიას, გურამ გაბისკირიასა და ნოდარ კანკიას ბიუსტები.
წმინდა იოანე ნათლისმცემლის სახელობის საკათედრო ტაძარში, დეკანოზმა იოანე კუპრეიშვილმა, აფხაზეთის ომში დაღუპულთა სულების მოსახსენებელი პანაშვიდი აღავლინა.
უახლესი ისტორიის ტრაგიკულ თარიღს მიეძღვნა ჟიული შარტავასა და მისივე სახელობის მხარეთმცოდნეობის მუზეუმების ორგანიზებით გამართული კვირეული, რომლის ფარგლებში, მოსწავლე-ახალგაზრდობის ჩართულობით, იმართებოდა თემატური საღამოები და ექსურსია-გაკვეთილები; საჯარო ბიბლიოთეკაში მოეწყო თემატური გამოფენა.
1993 წლის 27 სექტემბერი საქართველოს უახლესი ისტორიის ერთ-ერთი ყველაზე ტრაგიკული თარიღია - ეს არის სოხუმის დაცემის უმძიმესი დღე, ამასთან დღე, როდესაც ჩვენი ქვეყნის, მშობლიური სენაკის გამორჩეულმა შვილმა ჟიული შარტავამ, თავის თანამებრძოლებთან ერთად, თავი დადო სამშობლოსთვის და მოწამეობრივი სიკვდილით აღესრულა.
სოხუმს დაცემის დღესთან დაკავშირებით და აფხაზეთის ომში დაღუპულთა ხსოვნის პატივსაცემად, სენაკის მუნიციპალიტეტის მერიის ადმინისტრაციულ შენობაზე სახელმწიფო დროშა დაეშვა.
საქართველოს პრემიერ-მინისტრის განკარგულების შესაბამისად, საქართველოს მთელ ტერიტორიაზე, ყველა ადმინისტრაციულ შენობაზე, საქართველოს სახელმწიფო დროშები დაშვებულია.
